• এইখান সহৰেৰ মুঁই একজন দুর্ভিক্ষ সদাগৰ •
মোৰ সাৰ্টেৰ তলদিয়া
টোপাটোপে ৰক্ত পৰে
এইখান সহৰেৰ মুঁই একজন
দুর্ভিক্ষ সদাগৰ
হলুধ হোয়া উঠে মোৰ দুখ্যেৰ চান
এইখান সহৰেৰ মুঁই একজন
দুর্ভিক্ষ সদাগৰ
ৰক্তেৰ টোপালগুলা লবনেৰ মতো স্বাদ
বুকেৰ বিষাদগুলা সবুজ
এইখান সহৰেৰ মুঁই একজন
দুর্ভিক্ষ সদাগৰ
এইখান সহৰ আছিল মোৰ
মাতাল ৰাত্তিৰ গান
এখন গানগুলানো ধানেৰ পাতান
এইখান সহৰত সৈন্দা সৈন্দা
'দুষ্টু মেয়েৰ মিষ্টি হাঁসি'
এইখান সহৰেৰ মুঁই একজন
দুর্ভিক্ষ সদাগৰ
এইখান সহৰেৰ ঘাটা
সাপেৰ মতো টেঁৰা-বেঁকা
সাৰ্টেৰ ভিতিৰা পৰ্যন্ত সোন্দেয়া
দংশন কৰে কইল्জা
সৈত্যয়
এইখান সহৰেৰ মুঁই একজন
দুর্ভিক্ষ সদাগৰ !
ණ কন্দর্পজিৎ কল্লোল
মুখ্য পৃষ্ঠা
